فى الجو

انا عارف انى طولت شويه عليكم

لكن برضه انا معذور

عندى شركات كتيره فيها اكتر من 100 مليون موظف استقبال فقط ...ده غير بقى باقى الموظفين

المهم

مكدبشى عليكم يا جماعه

انا لما ركبت الطياره... والطياره طارت فى الجو..انا بصراحه خفت

لا متفتكروش انى خفت على نفسى

لا طبعا ابو لمعه عمره ميخاف ابدا

انا خفت لحسن حد يتصل بيا على التليفونات المحموله اللى معايا ويلاقيها مغلقه احسن انا مقلتلكمشى انى اخدت البطاريات بتاعه التليفونات وشحنت بيها الطياره ...يلا حصل خير

انا بقى فى الجو مش عارف اوزن الطياره خالص

كل شويه الطياره تميل يمين امد ايدى الشمال وادوس بيها على الارضيه علشان اوزن الطياره

مره تانيه الطياره تميل شمال امد ايدى اليمين وادوس بيها على الارضيه علشان اوزن الطياره

المهم طلعنا من امريكا ووصلنا للمحيط الاطلنطى

واحنا بقى طايرين بالطياره على ارتفاع 10 الاف قدم لمحت واحد بيغرق فى وسط المحيط وحطيت ودنى جنب الشباك سمعته وهو بيصرخ ويقول الحقونى يا عاااااااااااااااااااالم هاموت فطيس ...قلت الولد ده صوته مصرى ..لأ لايمكن ابو العربى يسيب مصرى زيه يغرق فى المحيط ابدا ..رحت دايس برجلى على الفرامل

مفيش فرامل

قعدت العب فى كل حاجه الطياره مش عايزه تفرمل ابدا

طيب اعمل ايه

واخويا المصرى هيغرق

رحت لابس البراشوت ورحت فاتح الشباك بتاع الطياره وطالع بره وقعدت ازحف وازحف لغايه لما وصلت لمقدمه الطياره وبقيت عند بوزها تماما روحت راجع لوراء خطوتين وجريت لقدام باقصى سرعه نطيت قبل الطياره بعشرين متر وسيبت نفسى انزل فى الجو

بصراحه كان الجو جميل والهواء يلطش فاخدت لى تعسيله واديتها نومه

ساعه ساعتين عشره انى اصحى ابدا بصراحه كنت تعبان قوى ونمت

وفجاءه سمعت صوت طائر بحرى بينادى عليا

ابو لمعه

يا ابو لمعه

اصحى يا ابو لمعه

انا صحيت من النوم وفتحت عينى لقيت نفسى نمت عشر ساعات وانا بنزل فى الجو رحت قلت للطائر البحرى احنا وصلنا للميه ولا لسه قالى الحق بقى افتح المظله علشان انت قربت

رحت فاتح المظله وفى ثانيه كنت قدام الراجل اللى بيغرق

رحت مطلعه من الميه لقيته ميييييييييييييييييييييييييييييييييين ؟؟؟؟؟؟

ايوه صح هو بوشبوش بعينه

رحت ضاربه برجلى وقلتله انت جاى ورايا لغايه هنا ..وعامل نفسك مصرى

ورحت فى ثوانى قالب المظله

بقيت رجلى للطياره ودماغى للميه راحت المظله طايره لفوق

وهوب فى ثوانى كنت عند الطياره طبعا العشرين خطوه اللى اخدتهم قبل الطياره نفعونى ..عبقال ما الطياره مشيتهم كنت انا وصلت
رحت راكب الطياره ونفخت
وقعدت ادوس بنزين علشان اوصل مصر
طبعا انتوا عارفين ان مصر هى امى ونفسى ارد جميلها واكمل ال 80 مليون
بس انا برضه كنت محتار ...امشى فى اى طريق ..يمين ولا شمال ...شرق ولا غرب
وفى ثوانى شغلت الطاسه
ورحت داخل على الركاب فى الطياره ومستلف منهم تليفون محمول واتصلت بواحد صحبى فى مصر
وقعدت اركز فى الكلام لقيت الكلام جاى من اتجاه الشرق رحت ماشى فى اتجاه الكلام لغايه لما وصلت مصر
شفت الهرم
قلت بس يابو لمعه عمر بشبوش ما هيقدر يجى هنا ابدا
لكن اوقف الطياره ازاى
معرفشى

بدايه رحله العوده

احنا وصلنا لغايه فين فى الحلقه اللى فاتت ؟؟؟؟؟؟؟؟
معلشى الواحد مشاغله كتيره ..والتليفونات المحموله اللى معايا بترن 90 ساعه فى ال 24 ساعه ...اصلى محسوبكم شايل خمس تليفونات محموله..تليفون لكل الشعب من طراز اتكلم براحتك ...وتليفون للشغل من طراز اشجينى بالاخبار ..وتليفون للاصدقاء من طراز اضربها صرمه ..وتليفون للسواقين علشان اغير العربيه بلون زراير القميص ...وتليفون للمدام وده خط بس .لسه مشترتشى العده ومش ناوى بصراحه اشتريها اصلا
اه
افتكرت
وصلنا لغايه لما انا دخلت الطياره وبوشبوش وكونداليزا وهيلارى قعدوا يعيطوا وانا كان قلبى عليهم حجر ومبصتلهمشى خالص وابوصلهم ليه .انا عايز اكمل ال 80 مليون
المهم

دخلت الطياره

وفضلت ادور على مكانى مش لقيه ....خدت الطياره بالطول والعرض من حاره لحاره ومن ميدان لميدان ومن كوبرى لكوبرى انى الاقى مكانى لايمكن ابدا
قلت خلاص مبدهاش انادى على الكمسرى
وقعدت انادى
انت ياعم ياكمسرى ....انت يابا ....انتوا يابشر ..ياكمسرررررررررررررررررررى
لقيت واحده اموره جايه ووشها كله بيضحك ..قالتلى ..خير يا استاذ انا تحت امرك ...انا المضيفه الجويه ام حرنكش
بصيت لها وقلت لها انا مش لاقى مكانى ...وادى الحصيره اللى انتوا مديهانى وعليها رقم الكرسى 654389865437
قالت لى معلشى الكرسى ده قاعد عليه ابن الطيار تعالى اقعد فى الحمام او مع الشنط
قلت لها ..انا ابو لمعه اقعد فى الحمام او مع الشنط ..طبعا انا عارف مين وراء المقلب ده ..مفيش غير بوشبوش وكونداليزا ..عايزين يضايقونى علشان ارجع ..لكن على مين وحياه ابوهم ما هيحصل ..امال مين هيكمل ال 80 مليون...
المهم انى خلاص عينى احمرت وودانى اخضرت ومناخيرى ازرقت وسنانى ابيضت وهجمت على كابينه الطيار ...وعلى طول مسكته من قفاه وقومته من على الكرسى واخدت منه الهيدفون اللى على ودانه وكان بيسمع اغنيه بحبك يا حمار
الطيار مقدرشى يتنفس ..طبعا هو عارف مين اللى قصاده ..لكن قالى وهو بيترعش ...حضرتك بتعرف تسوق طياره يا عمى ابو لمعه ؟؟؟
قلت له ..بس ياولد اسكت مش عايز اسمع صوتك ..انا اسأل بس وانت تجاوب
قالى حاضر يا عمى
قلت له ..فين الاولانى وفين التانى وفين المرشيدين وفين الدبرياش وفين الفرامل
اتأخر الطيار فى الاجابه خمس ثوانى ...لقى نفسه على الارض بيغنى ظلموه ..لكن علشان انا ابو لمعه ..قلبى حنين ومبحبش الاذيه لحد ..حطيت الهيدفون على ودنه علشان يكمل اغنيه بحبك يا حمار
قعدت افكر
تعمل ايه يا ابو لمعه ؟؟؟ تعمل ايه ؟؟
المهم قعدت العب فى الزراير زرار زرار ..والطياره راس ابوها والف سيف ماهى متحركه
طيب افوق الطيار يقولى بيحركها ازاى
لا طبعا ولو كان على جثتى
المهم
طلعت للركاب وقلت لهم يا جماعه الطياره قفشه شويه وعايزين زقه وحياه ابوكم
الناس مكدبوش خبر وطلعوا ولاد حلال ونزلوا يزقوا الطياره
هب هب هب هب هب
الطياره ثابته فى مكانها
وبصيت من شيش الشباك بتاع الطياره لقيت بوشبوش واقف وبيضحك وفاشخ صداغه على الاخر
وكونداليزا بتضرب كف على كف وعماله بتشخر من كتر الضحك
طبعا الدم غلى فى عروقى
وبرضه عينى حمرت وودانى خضرت ومناخيرى ازرقت وسنانى ابيضت وقلت للناس اركبوا الطياره انا هتصرف
ورحت لافف على ايدى منديل هاندى وضربت الازاز بتاع الطياره بالبوكس وكسرته
وخلعت حزام البنطالون وقلت للركاب اى حد لابس حزام يجيبه
وفعلا الركاب ولاد حلال جابوا احزمه بالعبيطه
ربطت الاحزمه فى بعض ولفيتها فى الهواء زى السندباد ورميتها على عامود نور بعيد
ورحت شادد الاحزمه اتحركت الطياره وطلعت لسانى لبوشبوش وكونداليزا وقلت لهم سلااااااااااااااااااااااااام يا ويكا

وللحديث بقيه

بدايه الحكايه

وعندك واحد اجدع تحيه لكل المدونين وصلحه

اعرفكم بنفسى :--- من غير ماتتخضوا ولاتخافوا اخوكم ابو لمعه 2008
سمعت ان تعداد مصر بقى 79999999 يعنى ناقص واحد ونكمل ال 80 مليون ..قلت ياض يا ابو لمعه صفى مشاريعك فى امريكا وبيع مصانعك وقصورك وعربياتك ..وروح بلدك علشان تكمل ال 80 مليون ...امال ايه ..انا وطنى..ومصر هى امى ..نيلها جوه دمى ..وهاحكى لكم عن اللى حصل معايا فى المطار

شوفوا يا جماعه
والله والله والله
وكمان قسم بالله
اى كلمه بكتبها هنا فى المدونه دى ...بكتبها بالكيبورد
علشان بس ممكن محدش يصدق كلامى ويقول عليا ابو لمعه ...لا الاسم حاجه والصدق حاجه تانيه خالص
اقولكم على اللى حصل معايا فى المطار

انا طبعا بعد ما بعت كل اللى ورايا واللى قدامى ..المبلغ اللى كان معايا كان جامد قوى ..وبلاش اقول كام علشان الحسد ...المهم ..لميت المبلغ كله وشحنته فى سبع سفن شحن كبار ..وانا قلت اخد طياره وعلى بلدى عدل

اول مادخلت المطار وقبل ما اركب الطياره ..لقيت بوش واقف قصادى عدل ...وقالى وعينه مليانه دموع ...مستر ابو لمعه ..حرام عليك تسبنا وتمشى ...انت لازم تعيش معانا ...قلت له ...معلش يا بوشبوش بلدى محتجانى ..لازم اكمل ال 80 مليون ...قالى لأ ..حرام عليك ..انا لايمكن اعيش فى امريكا من غيرك ..عاوز تمشى خدنى معاك ابوس ايدك ...قلت له اثبت امال يا بوشبوش ..مالك متأثر ليه ؟؟؟ ..هو انا اول ولا اخر واحد هيسيب امريكا ويرجع بلده ....قالى .طبعا لأ ..لكن انت المعلم الكبير ابو لمعه ..ولو مشيت اقتصادنا هينهار وحالنا هيوقف ..ومش هنعرف نطلع الفضاء تانى ..ولا هنعرف نتقدم خطوه واحده لقدام ....قلت له ..بوشبوش ...مهما تعمل ومهما تقول انا هارجع بلدى ..لازم اكمل ال 80 مليون
المهم يا جماعه
سيبته ومشيت
وقبل ما اطلع على سلم الطياره ...اتكعبلت فى كونداليزا رايس ...لقيتها واقفه وماسكه منديل ابيض وعماله تعيط وتمسح مناخيرها ...قلت لها مالك يا ليزا بتعيطى ليه ؟؟؟...قالت لى ...ابو لمعه ...وحياه ابوك ...ورحمه جدوده ماتكسر بخاطرنا وخليك قاعد هنا ..سوقت عليك النبى ياشيخ ما تكسر بخاطرنا ..ابوس ايدك ..حرام عليك تكسر بخاطرى زى ما كسرت بخاطر بوش ..انا واحده ست ..انا عندى برد ...قلت لها ..اسكتى ياليزا متقطعيش قلبى الوطن بينادينى ...هوووووووووم هووووووووم....انا لازم امشى دلوقتى حالا
قعدت ليزا على الارض وفضلت تعيط وتاخد من تراب المطار وتحط على شعرها
لكن
بلدى
مصر
ال 80 مليون لازم يكملوا
سيبتها ومشيت
وطلعت على سلم الطياره
وقبل مادخل الطياره لقيت هيلارى كلينتون واقفه ..وعنيها حمره زى الدم ...قلت لها ..ريرى فى ايه ؟؟؟؟؟؟ انتى كمان هتعيطى ...قالت لى ...ماهو بوش فاضله كام شهر ويسيب الرئاسه وممكن انا اكسب واكون الريسه ..وساعتها مش هسامح نفسى لو سيبتك تمشى ...قلت لها ..ريرى ...مقدرشى مقدرشى مقدرشى بلدى بتنادينى ال 80 مليون لازم يكملوا
ودخلت الطياره

للحديث بقيه